Մեծ հպարտությամբ պետք է նշենք, որ մեր նախկին կրթաթոշակառու Վրեժ Միքայելյանը, աշխատելով «Բազումք» տիեզերական հետազոտությունների լաբորատորիայի ինժեներական թիմում, մասնակցել է Հայասաթ-1 արբանյակի ստեղծմանը։ Վրեժի անմնացորդ աշխատասիրությունը և գիտելիքները դարձել են հիմք այս կարևոր նախագիծն իրականացնելու համար, որը ոչ միայն մեծ նշանակություն ունի Հայաստանի տիեզերական արդյունաբերության համար, այլ նաև ծնում է նոր հնարավորություններ նոր սերնդի տաղանդավոր ինժեներների համար։
«Հայասաթ-1» արբանյակը ստեղծվել է «Բազումք» տիեզերական հետազոտությունների լաբորատորիայի և Գիտական նորարարության և կրթության կենտրոնի համագործակցության արդյունքում։ Այն առաջիկայում կթռչի տիեզերք՝ կարևորագույն գիտական ուսումնասիրություններ իրականացնելու համար։
Այս մեծ հաջողությունը վառ ապացույցն է այն աշխատանքի, որը կատարում է Հայ Կրթական Հիմնարկությունը՝ պատրաստելով բարձրաստիճան մասնագետներ, որոնք կարող են հաղթահարել աշխարհի առաջատար ոլորտներում առաջ քաշվող մարտահրավերները։
