ՀԿՀ-ն շարունակական աջակցություն է տրամադրում Արցախից բռնի տեղահանված ուսանողներին՝ տրամադրելով կրթաթոշակներ
2023 թվականի սեպտեմբերի 19-ից հետո բռնի տեղահանված թվով 120 ուսանողների ուսման վարձերը փոխհատուցվեց Հայ Կրթական Հիմնարկության կողմից, ովքեր Հայաստանի տարբեր բուհերում շարունակում են իրենց կրթությունը։
Ուսանողները ՀՀ կառավարությունից ստացել էին ուսման վարձի մասնակի փոխհատուցում, իսկ մնացած մասի պատասխանատվությունը Հայ Կրթական Հիմնարկությունը վերցրել է իր հոգածությանը։
Բռնի տեղահանումից հետո ՀԿՀ կառավարման խորհուրդը միաձայն որոշում է կայացրել հիմնարկության կողմից իրականացվող կրթաթոշակային մրցույթից դուրս, հավելյալ կրթաթոշակներ հատկացնել հենց տեղահանված ուսանողներին։
Մարտի 15-ին մեր կողմից կազմակերպված միջոցառումը հենց տեղահանված ուսանողների համար էր, ովքեր ծանոթացան Հայ Կրթական Հիմնարկության գործունեությանն ու կրթաթոշակային ծրագրի մանրամասներին։
Ի դեպ, այս պահին էլ կրթաթոշակային ծրագրում ընդգրկված են թվով 1400 ուսանողներ, որոնցից 85-ը արցախցի են։
Հիշեցնենք նաև, որ Հայ Կրթական Հիմնարկությունը որակյալ տեխնոլոգիական կրթության համար կրկին տեղահանված 100 ուսանողների տրամադրել է կրթաթոշակ Armenian Code Academy-ում սովորելու համար։
