ՀԿՀ ուսանողները մասնակցեցին Ծաղկահավաքին՝ միավորելով հիշողությունն ու բնապահպանությունը

Այսօր իրականացավ Հայ Կրթական Հիմնարկության (ՀԿՀ) կողմից իրականացվող ամենախոշոր կամավորական ծրագրերից մեկը՝ Ծաղկահավաքը, որը կազմակերպել էր «Արալեզ» Բարեգործական ՀԿ-ն։

Արդեն տարիներ շարունակ ՀԿՀ-ի 300-ից ավելի ուսանողներ իրենց ակտիվ մասնակցությունն են ունենում այս նախաձեռնությանը՝ ապահովելով ոչ միայն հիշողության պահպանումը, այլև բնապահպանական կարևոր գործընթաց։

Ապրիլի 24-ին Ծիծեռնակաբերդի հուշահամալիրում դրված հարյուր հազարավոր ծաղիկները երկար տարիներ ուղղակիորեն տեղափոխվում էին աղբավայր և այրվում։ 2010 թվականից սկսած, Ծաղկահավաքի նախաձեռնության շնորհիվ, այս ծաղիկները ստանում են «երկրորդ կյանք»։ Թոշնած ծաղիկների ցողուններն առանձնացվում են ծաղկաթերթերից․ առաջինից պատրաստվում է պարարտախառնուրդ, իսկ ծաղկաթերթերը վերամշակվում են՝ օգտագործվելով ձեռակերտ թղթի արտադրության մեջ։

Այս նախաձեռնությունը միավորում է հիշողության, վերամշակման և բնապահպանության գաղափարները, ինչի շնորհիվ ծաղիկները շարունակում են կրել իրենց խորհրդանշական դերը՝ որպես հարգանքի ու հիշատակի լուռ դեսպաններ։

ՀԿՀ-ն հպարտ է իր ուսանողների նվիրվածությամբ և շնորհակալություն է հայտնում բոլոր կամավորներին՝ իրենց ներդրման համար։