Հայաստանի ազգային գրադարանի 105-ամյակը՝ կրթության և մշակույթի ամրապնդման նոր առիթ
Հուլիսի 4-ին նշվեց Հայաստանի ազգային գրադարանի հիմնադրման 105-ամյակը, կարևոր իրադարձություն, որը ևս մեկ անգամ ընդգծում է գրադարանի դերն ու նշանակությունը հայկական կրթության և մշակույթի պահպանման գործում։
Հայ Կրթական Հիմնարկությունը (ՀԿՀ) մշտապես եղել և շարունակում է մնալ ազգային կրթական հաստատությունների աջակիցը, և մենք ուրախ ենք, որ մեր ներդրումը նկատվել ու արժանացել է գնահատանքի։ Միջոցառման ընթացքում Հայաստանի ազգային գրադարանի տնօրեն Աննա Չուլյանը շնորհակալագիր և 105-ամյակի արծաթյա կրծքանշան հանձնեց ՀԿՀ գործադիր տնօրեն Արմինե Հարոյանին՝ ազգային գրադարանի ծրագրերին և նախաձեռնություններին մեր ցուցաբերած շարունակական աջակցության համար։
Այս բացառիկ արծաթյա կրծքանշանները, որոնք պատրաստվել են Թամանյանական շենքի մուտքի կամարի վրայի հավերժության խորհրդանիշի ոճով, գրադարանը հանձնել է այն կազմակերպություններին և անհատներին, որոնք նշանակալի ավանդ են ներդրել գրադարանի զարգացման գործում։
ՀԿՀ-ն իր խորին շնորհավորանքներն է հղում Հայաստանի ազգային գրադարանին այս նշանակալի հոբելյանի կապակցությամբ և մաղթում, որ այն միշտ մնա որպես կրթության և գիտելիքի անփոխարինելի օջախ՝ սերունդներին փոխանցելով գրավոր մշակույթի հարուստ ժառանգությունը։
