Վերանորոգված դպրոց․նոր հույս Խնձորուտում
Եվս մեկ դպրոց, այս անգամ Վայոց ձորի Խնձորուտ գյուղում, վերանորոգվել է Հայ Կրթական Հիմնարկության կողմից՝ դարձնելով այն ոչ միայն լուսավոր ու հարմարավետ ուսումնական միջավայր, այլ նաև համայնքի ապագայի հիմք։
Խնձորուտը գտնվում է սահմանամերձ գոտում՝ թշնամուց ընդամենը 1 կիլոմետր հեռավորությամբ, որտեղ ամեն օր կրակոցներ են հնչում։ Չնայած այս դժվարին պայմանների՝ գյուղի բնակիչները, այդ թվում՝ աշակերտները, չեն կորցնում իրենց հավատն ու ուժը։ Նրանք շարունակում են ապրել ու պայքարել հայրենիքի համար՝ նոր ու գեղեցիկ դպրոցում խոստանալով ավելի լավ սովորել, որպեսզի գյուղն ու Հայաստանը ծաղկեն և ապրեն։
Խնձորուտի միջնակարգ դպրոցի վերանորոգումը, որն իրականացվել է Հայ Կրթական Հիմնարկության միջոցներով, մի քանի նպատակ է հետապնդում՝ ապահովել երեխաների առողջ ու անվտանգ կրթական միջավայր և նպաստել ողջ համայնքի զարգացմանն ու բարեկեցությանը։
